Нукусдаги айрим маҳаллалар аҳолисига боғча пули 50 фоизга камайтирилади

Адлия вазирлигининг маълум қилишича, президентнинг 21 феврал ПҚ–70-сонли қарори билан тасдиқланган Қорақалпоғистон Республикасини ижтимоий-иқтисодий ривожлантириш бўйича янги дастур доирасида 1 апрелдан маъмурий бошқарув жиҳатдан Нукус шаҳри таркибига кирувчи “Қаратау” ва “Бестобе” маҳалла фуқаролар йиғинлари аҳолисига давлат мактабгача таълим ташкилотлари учун тўлов 50 фоизга қисқартирилади.

 

Шунингдек, майдони 5 минг квадрат метрдан юқори бўлган савдо комплекслари ва меҳмонхона хизматлари бўйича мазкур ҳудудда фаолиятини амалга ошираётган тадбиркорларга 2027 йил 1 январдан 2040 йил 1 январга қадар ер солиғи ва мол-мулк солиғи ставкалари 90 фоизга камайтирилган ҳолда қўлланилади.

 

Қарорга мувофиқ, 2026 йил якунига қадар ялпи ҳудудий маҳсулот 8,1 фоизга, саноат ишлаб чиқариш 8 фоизга оширилади. Ҳужжатда ишсизлик даражасини 4,2 фоизга, камбағалликни 3,2 фоизга тушириш, Нукус шаҳри, Қўнғирот ва Чимбой туманлари ҳамда 109 та маҳаллани ишсизлик ва камбағалликдан холи ҳудудга айлантириш белгиланган.

 

2030 йилга бориб эса экспорт ҳажмини 900 млн долларга, ялпи ҳудудий маҳсулотни 102,4 трлн сўмга етказиш, қишлоқ хўжалиги ишлаб чиқаришини ошириш ва саноат ҳамда хизматлар соҳасида 7,2 млрд долларлик лойиҳаларни амалга ошириш режалаштирилмоқда. 

 

Шу билан бирга, Вазирлар Кенгаши Раисининг Экология ва Оролбўйи ҳудудини ривожлантириш бўйича биринчи ўринбосари лавозими тугатилиб, чорвачилик ва яйловлардан самарали фойдаланиш масалалари бўйича янги ўринбосар лавозими жорий этилди.