"Қозоғистон араб давлатларига зарур бўлган ҳар қандай ёрдамни кўрсатишга тайёр" — Тўқаев
Қозоғистон Президенти Қосим-Жўмарт Тўқаев АҚШ, Исроил ва Эрон уруши жараёнида Баҳрайн, Қувайт, Қатар, Саудия Арабистони ва Бирлашган Араб Амирликлари раҳбарларига шахсий мурожаат йўллади.
The Astana Times'нинг хабар беришича, Қозоғистон Президенти Баҳрайн, Қувайт, Қатар, Саудия Арабистони ва Бирлашган Араб Амирликлари раҳбарларига шахсий мурожаат йўллаб, ушбу давлатлар халқларини мураккаб синовлар даврида самимий қўллаб-қувватлаб, бирдамлик изҳор қилди.
Президент матбуот котиби Айбек Смадияров 1 март куни Тўқаев Қозоғистонга дўст ва қардош бўлган давлатларнинг суверенитети ҳамда хавфсизлигига путур етказишга қаратилган ҳар қандай ҳарбий ҳаракатларни кескин қоралаганини маълум қилган эди.
Шунингдек, Президент Тўқаев араб давлатларига зарур бўлган ҳар қандай ёрдамни кўрсатишга тайёр эканини тасдиқлаб, уларнинг раҳбарлари билан фаол амалий алоқаларни сақлаб қолишига умид билдирди.
28 февраль куни Тўқаев Эрон атрофидаги кескинлик кучайиб бораётгани ва минтақавий беқарорлик мамлакатга таъсир кўрсатиши мумкинлиги фонида Қозоғистон Хавфсизлик кенгаши ҳамда ҳуқуқни муҳофаза қилувчи органларга фавқулодда чоралар режасини ишлаб чиқишни топширди.
Қозоғистон Ташқи ишлар вазирлиги эса Яқин Шарқдаги вазият ёмонлашгани сабабли мамлакатнинг хориждаги дипломатик ваколатхоналари учун фавқулодда алоқа рақамлари ва "ишонч телефонлари” рўйхатини эълон қилди.
