Президент Шавкат Мирзиёев Ўзбекистон фуқароларини Форс кўрфази давлатларидан эвакуация қилишни буюрди
Жидда—Тошкент йўналишида репатриация рейсларини ташкил этишга алоҳида эътибор қаратиш вазифаси юклатилди.
Президент Шавкат Мирзиёев Форс кўрфази мамлакатларида бўлиб турган ватандошларни ватанига қайтаришни самарали ташкил этиш юзасидан Бош вазир Абдулла Ариповга топшириқ берди.
2 март куни Вазирлар Маҳкамасида ўтказилган видеоселектор йиғилишида топшириқ ижросини таъминлаш масалалари муҳокама қилинди. Йиғилишда фуқароларни хавфсиз ва тизимли равишда Ўзбекистонга олиб келиш бўйича зарур чоралар ва аниқ вазифалар белгилаб олинди.
Хусусан, мамлакатдаги барча авиакомпанияларга Форс кўрфази давлатларида бўлиб турган ватандошларни репатриация қилиш чораларини кўриш топширилди.
Айниқса, Жидда—Тошкент йўналишида рейсларни ташкил этишга алоҳида эътибор қаратиш вазифаси юклатилди.
Йиғилишда шунингдек, тегишли вазирлик ва идоралар раҳбарларига Форс кўрфази давлатлари билан амалдаги келишувларнинг ижро ҳолатини таҳлил қилиш ва экспорт-импорт операциялари учун муқобил йўналишларни кўриб чиқиш бўйича топшириқлар берилди. Зарур чоралар вазиятга мос равишда тезкорлик билан амалга оширилади.
Аввалроқ Ўзбекистоннинг Кувайт элчихонаси ўз фуқароларига хавфсизлик талабларига қатъий риоя қилишни тавсия қилган эди.
