Шимолий Корея АҚШ ва Исроилнинг Эронга ҳужумларини қоралади
КХДР Эронга қарши ҳарбий операцияларни ноқонуний тажовуз деб атади.
Шимолий Корея АҚШ ва Исроилнинг Эрон ҳудудида олиб борган ҳарбий операциясини кескин қоралади. Бу ҳақда Reuters мамлакат Ташқи ишлар вазирлиги вакили баёнотига таяниб хабар берди.
Баёнотда таъкидланишича, АҚШнинг фаол қўллаб-қувватлови остида амалга оширилган Исроилнинг Эронга қарши ҳарбий ҳужуми ҳамда унга қўшилган АҚШнинг ҳарбий ҳаракатлари ноқонуний тажовузкорлик ва давлат суверенитетини қўпол равишда бузиш сифатида баҳоланган.
“Биз ўзининг худбин ва гегемонлик амбицияларига эришиш учун ҳарбий куч ишлатишдан тортинмаётган АҚШ ва Исроилнинг шармандали ҳамда босқинчилик хатти-ҳаракатларини қатъий қоралаймиз”, дейилади баёнотда.
Шимолий Корея, шунингдек, АҚШнинг бундай сиёсати дунё тинчлиги ва барқарорлигига жиддий таҳдид солаётганини таъкидлаб, назорат қилиб бўлмайдиган “қаттиққўл ва ўзбошимча амалиётлар” Яқин Шарқдан ташқарида ҳам сиёсий, иқтисодий ва геосиёсий оқибатларга олиб келиши мумкинлигидан огоҳлантирди.
