Тошкент ва Наманганда 33,4 минг дона кучли таъсир қилувчи дори воситалари мусодара қилинди
Тезкор тадбирлар давомида ноқонуний дори савдоси билан шуғулланган бир нечта шахслар қўлга олинди.
Давлат хавфсизлик хизмати ҳамда Ўзбекистон Ички ишлар органлари ҳамкорлигида ўтказилган тезкор тадбирлар давомида 33,4 минг дона кучли таъсир қилувчи дори воситалари ноқонуний муомалададан чиқарилди. Бу ҳақда ДХХ Zamon.uzга хабар берди.
Маълум қилинишича, тезкор тадбир давомида Зангиота туманида яшовчи 1996-йилда туғилган шахс ҳамда унинг 1999-йилда туғилган Самарқандлик таниши Тошкент ҳудудида тўхтатилган ва текширилган. Текширув жараёнида улардан 8 400 дона “Regapen” кучли таъсир қилувчи дори воситалари аниқланган.
Шунингдек, гумонланувчилар вақтинчалик омбор сифатида фойдаланиб келган Чилонзор туманидаги хонадонда ўтказилган кўздан кечириш жараёнида 12 600 дона “Regapen”, ишлаб чиқарувчи фирмаси аниқланмаган 10 минг дона турли дори воситалари, дориларни қадақлаш учун мўлжалланган 500 дона идиш ҳамда қалбаки дорилар қадақларига ёзув тушириш учун ишлатиладиган маркерловчи мини-принтер қурилмаси ашёвий далил сифатида мусодара қилинган.
Бошқа бир тезкор тадбирда эса Давлат хавфсизлик хизмати Тошкент шаҳар бошқармаси, ички ишлар ва божхона органлари ҳамкорлигида 1994-йилда туғилган шахс 6 дона “Zardeks” кучли таъсир қилувчи дори воситасини 600 минг сўм эвазига сотаётган вақтда қўлга олинган.
Тезкор тадбир давом эттирилиб, ушбу дориларни етказиб бериб келган Наманганда яшовчи, 1987-йилда туғилган ва муқаддам судланган фуқаро ҳам пойтахт ҳудудида ушланган. Унинг “Tracker” русумли автомашинасидан 12 400 дона “Zardeks” ҳамда 14 дона “Regapen” дори воситалари процессуал тартибда расмийлаштирилган ҳолда олинган.
Ҳозирда мазкур ҳолатлар юзасидан гумонланувчиларга нисбатан жиноят ишлари қўзғатилган бўлиб, тергов ҳаракатлари олиб борилмоқда.
