Тошкент вилояти прокуратураси ходими 9 минг доллар пора билан қўлга олинди
Ходим тадбиркордан 276 миллион сўмлик жаримани танишлари орқали бартараф қилиш ҳамда унга нисбатан чора кўрилмаслигини таъминлаш эвазига пул талаб қилган.
Давлат хавфсизлик хизматининг Zamon.uz га маълум қилишича, Тошкент вилояти прокуратурасининг девонхона нозири Ўртачирчиқ туманидаги якка тартибдаги тадбиркорга тегишли савдо дўконида электр энергиясидан ноқонуний фойдаланганлик ҳолати бўйича аниқланган 276 миллион сўмлик жаримани ваколатли танишлари орқали бартараф этиб бериш ва унга нисбатан чора кўрилмаслигини таъминлаш эвазига 9 минг АҚШ доллари сўраган.
Шунингдек, девонхона нозири ҳозирда Наманган шаҳридаги олийгоҳда ўқиётганлиги боис, талаб этилган пулни шу жойга олиб келиб беришни айтган. Давлат хавфсизлик хизмати ходимлари томонидан ўтказилган тезкор тадбирда нозир 9 минг АҚШ долларини Наманган вилоятида олган вақтида ашёвий далиллар билан ушланди.
Ҳолат юзасидан Наманган вилояти прокуратураси томонидан ушбу шахс ва бошқаларга нисбатан Жиноят Кодексининг 25,168-моддаси (фирибгарлик) 3-қисми “в” банди ва 28,211-моддаси (пора бериш) 1-қисми билан жиноят иши қўзғатилиб, девонхона нозирига нисбатан "қамоқ" эҳтиёт чораси қўлланилди.
