Тошкентда нарколаборатория ташкил қилган шахс қўлга олинди

Давлат хавфсизлик хизмати Тошкент шаҳар бўйича бошқармаси ва Ички ишлар органлари ҳамкорлигида ўтказилган тезкор тадбирда 1999 йилда туғилган шахс пойтахт ҳудудидаги кўп қаватли уйларнинг ёлақлари ва бошқа жойларга хориждан олиб келинган гиёҳвандлик воситаларини беркитиб қўяётганлиги аниқланиб, қўлга олинди.

 

Ҳолислар иштирокида шахснинг ёнидан ва автомашинасидан 15 дона кичик бўлакларда “Алъфа ПВП” ва 24 дона бўлакларда “Мефедрон” гиёҳвандлик воситалари топилди.

 

Шунингдек, тезкор тадбир давомида шахснинг яшаш хонадонида уйнинг ертўласида нарколаборатория ташкил қилинганлиги аниқланиб, жами 2,8 кг гиёҳванд модда ва 11,5 литр прекурсорлар, шунингдек лаборатория учун зарур асбоб-ускуна ва бошқа буюмлар далил сифатида расмийлаштирилди.

 

Бундан ташқари, шахснинг телефондаги геолокация маълумотлари ёрдамида, илгари Сирдарё вилоятининг Ховос туманидаги яширин жойдан 49,9 кг синтетик наркотиклар ва 48 литр прекурсорлар топилди.

 

Ҳозирда ушбу шахсга нисбатан Жиноят кодексининг 28, 246-моддаси 2-қисми ва 273-моддаси 5-қисми билан жиноят иши қўзғатилган ва “қамоқ” эҳтиёт чораси қўлланилган. Тергов ҳаракатлари давом этмоқда.