Ўзбекистоннинг Исроилдаги элчихонаси фуқароларни мамлакатни вақтинча тарк этишга чақирди
Исроилни тарк этиш учун Исроил-Миср чегарасида тун-у кун ишлайдиган “Бегин” пунктидан фойдаланиш тавсия қилинмоқда.
"Дунё" ахборот агентлигининг хабар беришича, Яқин Шарқ минтақасидаги вазиятнинг кескинлашуви ортидан Ўзбекистоннинг Исроилдаги элчихонаси фуқароларни мамлакатни тарк этишга чақирди.
Ватандошларга ҳушёрликни сақлаш, Исроил ҳукумати томонидан белгиланган хавфсизлик чораларига қатъий риоя қилиш ва имкон қадар кейинги кўрсатмалар олингунга қадар махсус жиҳозланган хавфсиз ҳудудларда бўлиш ҳамда ваколатхона расмий кўрсатмаларга диққат билан амал қилиш, заруратсиз кўчага чиқишни чеклаш ва хотиржамликни сақлаш тавсия қилинди.
Шунингдек, фуқароларга вазият барқарорлашгунга қадар Исроил ҳудудини вақтинча тарк этиш тавсия қилинган. Элчихона Исроил-Миср чегарасида "Бегин" чегара ўтиш пункти тун-у кун ишлашини, шу билан бирга, Ўзбекистон фуқароларининг Синай яриморолига кириши учун виза талаб қилинмаслигини эслатиб ўтди.
"Чегарадан ўтишни тезлаштириш мақсадида чегара божларини олдиндан онлайн тарзда тўлаш тавсия этилади. Бошқа қуруқликдаги ўтиш пунктларидан фойдаланиш тавсия этилмайди, уларнинг иш вақти ўзгариши мумкинлиги сабабли, саёҳатни режалаштиришдан олдин долзарб маълумотларни аниқлаштириш зарур", дейилади хабарда.
Элчихона фуқароларидан Ўзбекистон Ташқи ишлар вазирлиги ва хориждаги дипломатик ваколатхоналарнинг расмий манбаларидаги янгиликларни мунтазам кузатиб боришга ҳамда Исроил хизматларининг огоҳлантиришлари ва тавсияларини инобатга олишни сўради.
Баёнотда қайд этилишича, фавқулодда вазиятларда ватандошлар қуйидаги телефон рақамлар ва почта манзилига мурожаат қилишлари мумкин:
- телефон рақамлари: 03−672−2466, 03−672−2371, 03−758−5075, 03−758−5076, +972 54 485 1397
- электрон почта: il.uzembassy@mfa.uz.
