Эрондаги ўзбекстонликлар Туркманистон орқали эвакуация қилинади
Асосий йиғилиш жойи Серахш шаҳри бўлиб, дипломатик миссия ходимлари фуқароларни кутиб олиб, хавфсиз ташишни таъминлайди.
Ташқи ишлар вазирлиги Туркманистон орқали Эрондан қайтаётган ватандошларга ёрдам бериш операциясини бошлади. Ушбу операция доирасида Ўзбекистоннинг Ашхободдаги элчихонаси Туркманистон расмийлари ва Теҳрондаги ҳамкасблари билан ҳамкорликни кучайтириб, барча жараёнларни мувофиқлаштирмоқда. Бу ҳақда Дунё ахборот агентлиги хабар берди.
Эвакуация жараёни Туркманистон-Эрон чегарасидаги Серахс шаҳрида ташкил этилган бўлиб, айнан шу ерда дипломатлар фуқароларни кутиб олади ва уларни хавфсиз тарзда Ўзбекистонга етказади. Элчихона машина ва ходимлари аллақачон сафарбар қилинган.
Ёрдамга муҳтож Ўзбекистон фуқаролари ва уларнинг яқинлари қуйидаги Туркманистондаги масъул шахслар билан бевосита боғланишлари мумкин:
+993 64 78-04-44 — Жасур Ашуров
+993 64 99-34-58 — Жамшид Бўриев
+993 62 20-49-56 — Жасур Ахмедов (консул)
Дипломатлар транзитнинг имкони борича тез ва хавфсиз амалга оширилишини таъминлаш учун чегарадан ўтиш жараёнини мувофиқлаштирадилар.
Аввалроқ Президент Шавкат Мирзиёев Бош вазир Абдулла Ариповга Форс кўрфази давлатларида истиқомат қилаётган Ўзбекистон фуқароларининг хавфсиз ватана қайтарилишини таъминлаш топшириқни берган эди.
