Аҳолини рўйхатга олиш тадбирининг дастлабки натижалари эълон қилинди
Тадбир доирасида 30 миллиондан ортиқ фуқаро онлайн тарзда мустақил рўйхатдан ўтган.
Маълумотларга кўра, мазкур тадбир доирасида 30 миллиондан ортиқ фуқаро (хонадонларнинг 82,3 фоизи) онлайн тарзда мустақил рўйхатдан ўтган. Маҳалла вакиллари уйма-уй юриб, планшетлар орқали жами 8,3 миллион хонадонни тўлиқ рўйхатга олган.
Шунингдек, маълумотлар такрорланмаслиги учун тизим шахсий рақамлар (ЖШШР) ёрдамида автоматик текширилган.
Рўйхатдан ўтмаганлар учун алоҳида тавсиялар берилган. Улар 1851 қисқа рақамига қўнғироқ қилиб маълумот олишлари мумкин.
Қайд этилишича, март ойида маълумотларнинг аниқлигини текшириш мақсадида тасодифий танланган хонадонларга (10% гача) мутахассислар қайта ташриф буюриши мумкин. Барча шахсий маълумотлар шифрланган ҳолда сақланади ва фақат умумлаштирилган статистик мақсадларда ишлатилади.
Дастлабки натижалар 2026 йил 1 июлгача, якуний таҳлилий маълумотлар 2027 йил 1 июлгача эълон қилинади.
