АҚШнинг Саудия Арабистонидаги элчихонасига дронлар зарба берди
Доналд Трамп элчихонага қилинган ҳужум жавобсиз қолмаслигини билдирди.
Саудия Арабистони пойтахти Ар-Риёддаги АҚШ элчихонасига иккита дрон билан ҳужум уюштирилиши оқибатида дипломатик мажмуа ҳудудида ёнғин чиқиб, элчихона биноларига енгил моддий зарар етган. Бу ҳақида Саудия Мудофаа вазирлигига таяниб Al Jazeera хабар берди.
Маълумотларга кўра, ҳужумдан сўнг Ар-Риёднинг хорижий дипломатик ваколатхоналар жойлашган квартали узра қора тутун кўтарилган.
Манбалар кучли портлаш овози эшитилгани ва элчихона ҳудудида ёнғин юзага келганини билдирган. Бироқ Саудия Мудофаа вазирлиги ва манбалардан бири дрон ҳужумидан кейинги ёнғин кичик кўламли бўлганини таъкидлаган. Ҳужум пайтида элчихона биноси бўш бўлган ва жабрланганлар ҳақида маълумотлар йўқ.
Шунингдек, кейинроқ Эроннинг АҚШ–Исроил ҳужумларига жавоб ҳаракатлари доирасида Кўрфаз бўйлаб амалга ошираётган зарбалари фонида яна бир нечта дронлар мазкур ҳудудни нишонга олгани ҳақида хабарлар тарқалди.
АҚШ президенти Доналд Трамп NewsNation нашрига берган баёнотида элчихонага қилинган ҳужум ва бир нечта америкалик ҳарбий хизматчиларнинг ҳалок бўлганини АҚШ жавобсиз қолдирмаслигини билдирди, “Тезда билиб оласизлар”, — деди президент жавобга ишора қилиб.
Саудия ҳарбий доираларига яқин манба AFP агентлигига махфийлик шарти билан маълум қилишича, ҳаво ҳужумидан мудофаа тизимлари Ар-Риёд Дипломатик кварталига йўналтирилган тўртта дронни йўқ қилган.
Сешанба куни эрталаб АҚШ элчихонаси Саудия Арабистонининг Ар-Риёд, Жидда ва Дахрон шаҳарларидаги АҚШ фуқароларига ҳужумлар фонида хавфсиз жойлардан чиқмаслик ҳақида огоҳлантириш эълон қилиб, элчихона ҳудудига яқин келмасликни сўради.
Айни пайтда, Эрон Баҳрайндаги АҚШ ҳарбий базасига ҳам зарба берилганини маълум қилди. Бу ҳолат АҚШ–Исроил ҳужумларига жавоб сифатида АҚШ объектлари жойлашган Форс кўрфазидаги араб давлатларига босимни кучайтирмоқда.
