Бухорода терроризмни молиялаштиришда иштирок этган ота ва ўғил аниқланди
Ўғил Сурия давлатидаги “Тавҳид ва жиҳод катибаси” сафида қўшилган, интернет ва криптовалюта орқали пуллар тўплаган.
Бухоро шаҳрида халқаро террорчилик фаолиятини молиялаштиришга алоқадор оилавий ҳолат аниқланиб, Давлат хавфсизлик хизмати томонидан тезкор-қидирув тадбирлари ўтказилди. Бу ҳақда ДХХ Zamon.uzга хабар берди.
Маълум қилинишича, 1999 йилда туғилган фуқаро 2019 йилда Сурия давлатидаги “Тавҳид ва жиҳод катибаси” халқаро террорчилик ташкилоти сафида қўшилиб, интернет орқали бошқа фуқаролардан пул маблағларини йиғиш ва криптовалюта шаклида ўтказиш билан ташкилотнинг молиявий таъминотини яхшилашга ёрдам берган.
2021–2025 йиллар давомида у ўзбек фуқароларини криптовалюта орқали маблағ юборишга даъват қилган, натижада катта миқдорда пул йиғилган.
Шунингдек, 1965 йилда туғилган ота ҳам ўғлининг фаолиятига жалб қилинган. Ота 2022–2025 йиллар давомида “BINANCE” крипто-биржаси орқали жами 13 597 USDT маблағни ўғилга юборган.
Аввалроқ у диний экстремизм ва ақидапаростлик материалларини тарқатгани учун 2019 йилда 5 йилга озодликдан маҳрум этилган, кейинчалик шартли равишда озод қилинган.
Давлат хавфсизлик хизмати томонидан олиб борилган тезкор-қидирув тадбирлари натижасида жиноят ишига чек қўйилди.
Бухоро шаҳар судининг қарорига кўра, 1965 йилда туғилган ота Жиноят кодексининг 155³-моддаси 2-қисми “а” банди ва 278⁸-моддаси 2-қисми “а” бандида кўрсатилган жиноятларни содир этганликда айбли деб топилиб, 10 йил 2 ойга озодликдан маҳрум этилди.
1999 йилда туғилган ўғил эса Жиноят кодексининг 244¹, 244², 155² ва 155³-моддалари билан айбланиб, унга нисбатан қидирув эълон қилинди.
