"Эронга қарши операцияни қанча керак бўлса, шунча давом эттиришга тайёрмиз" — Трамп
Дастлаб барча ҳаракатларни 3–4 ҳафта ичида якунлаш режалаштирилганига қарамасдан амалиёт муддати чўзилиши ҳам мумкин.
Қўшма Штатлар Президенти Доналд Трaмп Эронга қарши олиб борилаётган ҳарбий операция кутилганидан узоқроқ давом этиши мумкинлигини маълум қилди.
Трамп операцияни қанча керак бўлса, шунча давом эттиришга тайёр эканини таъкидлаб, бунда ҳеч қандай зерикарли жиҳат йўқлигини билдирди. Президентнинг сўзларига кўра, Вашингтон ушбу ҳаракатларни Эрон томонидан келаётган таҳдидларни бартараф этиш учун амалга оширмоқда.
Оқ уй раҳбари Эроннинг ракета дастури жадал ривожланаётганини, ҳозирги амалиёт амалга оширилмаганда яқин келажакда Теҳрон АҚШ ҳудудига етиб бора оладиган ракеталарга эга бўлиши мумкинлигини билдирди.
Шунингдек, Трамп Эроннинг ядровий қуролга эга бўлиши АҚШ учун мутлақо қабул қилиб бўлмас ҳолат эканини қайд этди.
Трамп Барак Обама маъмурияти даврида Эрон билан тузилган ядровий келишувдаги иштирокини тўхтатиш қароридан фахрланишини билдирди ҳамда Теҳроннинг ядровий қуролга эга бўлишига йўл қўймасликка ваъда берди.
Президентнинг таъкидлашича, АҚШ Эрон флотини йўқ қилиш бўйича ҳаракатларни амалга оширмоқда ва ҳозирга қадар ўнта кема чўктирилган. Шу билан бирга, у Эроннинг ядровий дастури тўлиқ йўқ қилинганини билдириб, Теҳрон бошқа ҳудудларда уни қайта тиклашга уринмаслиги кераклиги ҳақида огоҳлантирилганини қўшимча қилди. Унинг сўзларига кўра, Эрон бу огоҳлантиришларга қарамай, ядровий қурол яратишга интилишдан воз кечмаган.
