Президент ҳузурида қўшинларнинг жанговар шайлигини ошириш ва замонавий қурол-яроғ билан таъминлаш масалалари кўриб чиқилди

3 март куни Шавкат Мирзиёев раислигида мамлакат мудофаа қобилиятини мустаҳкамлаш масалаларига бағишланган йиғилиш бўлиб ўтди. Унда Ўзбекистон мудофаа салоҳиятини янада кучайтириш, ҳарбий хавфсизликни таъминлаш ҳамда устувор вазифалар ижроси муҳокама қилинди.

 

Йиғилишда жорий йил 13 январ куни Ўзбекистон Хавфсизлик кенгашининг кенгайтирилган йиғилишида белгиланган вазифаларнинг бажарилиш жараёни ҳам кўриб чиқилди.

 

Таъкидланишича, дунёда кескинлик ва можаролар очоқлари сақланиб қолаяпти, геосиёсий рақобат кучаяб, янги хавф ва таҳдидлар пайдо бўлаяптиган шароитда мамлакат мудофаа қобилиятини мустаҳкамлаш масаласи алоҳида аҳамият касб этмоқда.

 

Йиғилишда Ўзбекистон Мудофаа вазирлиги томонидан қўшинларнинг жанговар шайлигини ошириш, ҳарбий қисмлар ва бўлинмаларни тезкор тайёрлаш, уларни замонавий қурол-яроғ ва техника билан таъминлаш борасида амалга оширилаётган ишлар юзасидан ахборот берилди.

 

Шунингдек, ривожланган давлатларнинг илғор тажрибасини ўрганиш, ҳарбий бошқарув тизими ва тайёргарлик жараёнига замонавий ёндашувларни жорий этиш зарурлиги қайд этилди. Хусусан, қўшинлар самарадорлигини ошириш мақсадида янги технологиялар, жумладан учувчисиз тизимлар ҳамда рақамли бошқарув ечимларидан кенг фойдаланиш муҳимлиги таъкидланди.

 

Йиғилишда ҳарбий-маъмурий секторлар, полигонлар, ҳарбий таълим муассасалари ва моддий-техник таъминот объектлари инфратузилмасини замон талаблари асосида модернизация қилиш ва ривожлантириш бўйича аниқ вазифалар белгиланди.

 

Шунингдек, ҳарбий кадрлар тайёрлаш тизимини такомиллаштириш, илмий тадқиқотларни кучайтириш ҳамда замонавий қурол-яроғ ва технологияларни ўзлаштиришга қаратилган дастурларни кенгайтириш юзасидан тегишли топшириқлар берилди.

 

Йиғилиш якунида давлат раҳбари Ўзбекистон Қуролли Кучларини янада ривожлантириш ва мамлакат мудофаа қобилиятини мустаҳкамлаш бўйича устувор вазифаларни белгилаб берди.