Тошкентда 5 ойлик чақалоқ вакцинадан сўнг операция қилинди
Маълум бўлишича, бола эмланганидан сўнг оёғи йиринглаб кетган.
Ижтимоий тармоқларда Тошкент шаҳрида онанинг фарзанди вакцина олганидан сўнг оёғи йиринглагани айтилган видеомурожаат тарқалганди. Пойтахт соғлиқни сақлаш вазирлиги ҳолат юзасидан расмий муносабат билдирди.
Қайд этилишича, вазиятга аниқлик киритиш мақсадида Соғлиқни сақлаш вазирлиги Ишчи гуруҳи томонидан эпидемиологик текширув амалга оширилган.
Аниқланишича, жорий йил 23 февраль куни Яккасарой туманидаги 58-сон оилавий поликлиникада беш ойлик Ш.И.га 2865 Х 008 А серияли Пентавалент (АКДС+ВГВ+ХИБ)-2, ОПВ-3 ва РОТА-3 вакциналари билан режалаштирилган эмлаш ўтказилган. Эътироз билдирилган Пентавалент вакцинаси 2027 йил октябригача яроқли ҳисобланади.
“22 январдан 23 февралга қадар ушбу поликлиникада мазкур вакцина билан 78 нафар бола эмланган. Ш.И. эмланган кунда эса 17 нафар бола вакцина олган бўлиб, уларда нохуш ҳолатлар кузатилмаган. Эмлашни амалга оширган ваксинатор 6 йиллик иш тажрибасига эга”, дейилади расмий баёнотда.
24 февраль куни патронаж ҳамшираси томонидан чақалоқнинг инъекция қилинган жойида қизариш ва оғриқ, тана ҳароратининг 37,5 даражагача кўтарилиши қайд этилган. 25 февраль куни педиатр томонидан ўтказилган кўрикда боланинг аҳволи қониқарли экани, инъекция жойининг юқори қисмида 3х3 см ўлчамда қаттиқлик ва гиперемия борлиги аниқланган.
Кейинчалик чап соннинг юқори қисмида абсесс аниқланиб, 27 февраль куни жарроҳлик йўли билан очилган. Мутахассислар абсесс эмлаш жойидан юқорироқда жойлашганини ва вакцинация билан боғлиқ эмаслигини билдирган. Ҳозирги вақтда боланинг ҳолати қониқарли экани айтилмоқда.
Мутахассис хулосасига кўра, абсесс пайдо бўлишига сифатсиз тагликдан нотўғри фойдаланиш, тери қичишиши натижасида механик шикастланиш, шамоллаш ва иммунитет пасайиши ҳамда сон соҳасининг узоқ вақт эзилиши сабаб бўлган.
Таъкидланишича, 2025 йил сентябрь ойида мамлакатга 2 млн 600 минг доза 2865 Х 008 А серияли Пентавалент вакцинаси олиб келинган. Ушбу серия билан республика бўйича 1 миллиондан ортиқ, Тошкент шаҳрида 50 мингдан зиёд бола эмланган бўлиб, вакцинациядан кейинги ножўя ҳолатлар қайд этилмаган.
