Ўзбекистонда банк иловаларида пул ўтказмаларининг мақсадини кўрсатиш талаб этилади

Ўзбекистон Марказий банки тижорат банклари ва тўлов ташкилотларига картадан картага (P2P) пул ўтказмалари учун тўлов мақсадини белгилаш функциясини жорий этиш бўйича топшириқ берди.

 

Янги тартибга кўра, фойдаланувчилар банк мобил иловалари орқали пул ўтказмасини амалга ошираётганда транзакциянинг мақсадини махсус тоифалардан бирини танлаш орқали кўрсатишлари керак бўлади.

 

Банк ва “Мижоз” Telegram канали маълумотларига кўра, юборувчилардан 16 та тоифадан иборат рўйхатдан пул ўтказмасининг мақсадини танлаш талаб этилади. Ушбу тоифалар қаторига қариндошларга пул ўтказиш, хизматлар учун тўловлар, қарзларни қайтариш, хайрия маблағлари, озиқ-овқат харажатлари ҳамда бошқа маиший тўловлар киради.

 

Қайд этилишича, айрим fintech хизматлари ушбу функцияни аллақачон жорий қилган бўлса, бошқа платформада янги тизимга босқичма-босқич ўтилмоқда.

 

Марказий банк ушбу янгилик техник хусусиятга эга эканини таъкидлаб, унинг асосий мақсади пул оқимлари статистикаси бўйича янада аниқроқ маълумотларни шакллантириш ҳамда транзакциялар алгоритмларини такомиллаштиришдан иборат эканини маълум қилди. Шунингдек, тўпланган маълумотлар банкларнинг ички тизимларида сақланиши ва учинчи шахсларга берилмаслиги қайд этилди.

 

Янги тасниф мобил пул ўтказмалари ҳажми сезиларли даражада ошиб бораётган бир пайтда жорий этилмоқда. Маълумотларга кўра, 2025 йилда 1 миллион сўмдан 5 миллион сўмгача бўлган ўтказмалар умумий транзакция ҳажмининг 16,8 фоизини ташкил этган.

 

Таъкидланишича, янги талаблар амалдаги банк хизматлари тарифларига таъсир қилмайди. Шу билан бирга, фойдаланувчиларга пул ўтказмасини тасдиқлашдан аввал транзакция тафсилотлари ва танланган тоифа тўғрилигини диққат билан текшириш тавсия этилади.