Қарши ва Бухорода бозор мансабдорларига нисбатан жиноят иши қўзғатилди

Давлат хавфсизлик хизмати ҳамда бошқа ҳуқуқни муҳофаза қилувчи органлар ходимлари томонидан ўтказилган тезкор тадбирлар давомида деҳқон бозорларида содир этилган коррупцион ҳолатлар фош этилди. Текширувларда айрим мансабдор шахслар аукцион орқали сотилиши лозим бўлган савдо нуқталарини шахсий моддий манфаат эвазига ноқонуний равишда фуқароларга сотиш билан шуғуллангани аниқланган. Бу ҳақда ДХХ Zamon.uz’га хабар берди.

 

Хусусан, Қарши шаҳрида фаолият юритувчи деҳқон бозори раиси ва назоратчиси ўзаро тил бириктириб, бозор ҳудудида янги қурилган 110 квадрат метр майдонга эга савдо дўконини тадбиркорлик билан шуғулланишни режалаган фуқаро номига расмийлаштириб бериш эвазига ундан 80 минг АҚШ доллари талаб қилган. Улар олдиндан 30 минг АҚШ долларини олаётган вақтида ашёвий далиллар билан қўлга олинган.

 

Мазкур ҳолат юзасидан гумонланувчиларга нисбатан Жиноят кодексининг 168-моддаси 4-қисми “а” банди ҳамда 28, 211-моддаси 3-қисми “а” банди билан жиноят иши қўзғатилиб, тергов ҳаракатлари олиб борилмоқда.

 

Шунингдек, яна бир ҳолатда Бухоро шаҳридаги қишлоқ хўжалиги маҳсулотлари улгуржи савдоси амалга ошириладиган бозорда ҳам шунга ўхшаш қонунбузарлик аниқланган. Бозор раҳбари ва иш юритувчиси ўзаро тил бириктириб, бозор ҳудудида енгил конструкцияли савдо дўкони қуриш ҳамда тадбиркорлик фаолияти билан шуғулланиши учун 120 квадрат метр ер майдони ажратиб бериш эвазига фуқародан 11 минг АҚШ доллари олган вақтида уларнинг ноқонуний ҳаракатларига чек қўйилган.

 

Мазкур ҳолат бўйича ҳам Жиноят кодексининг 168-моддаси 3-қисми “а, в” бандлари билан жиноят иши қўзғатилиб, ҳозирда тергов ҳаракатлари давом этмоқда.