АҚШ Эрон билан можаро бошланганидан бери қарийб 2 млрд долларлик техника йўқотди
Энг катта йўқотиш Қатардаги базада жойлашган радар тизими бўлган.
АҚШ Эрон билан ҳарбий қарама-қаршилик бошланганидан бери қарийб 2 миллиард долларлик ҳарбий техникасини йўқотгани маълум қилинди. Бу ҳақда Anadolu агентлиги хабар берди.
Маълумотларга кўра, Эрон томонидан берилган зарбалар натижасида АҚШга етказилган умумий зарар тахминан 1,9 миллиард долларға баҳоланмоқда.
Хусусан, Қувайт ҳудудида жойлашган ҳарбий базада АҚШга тегишли учта F-15E Strike Eagle қирувчи самолёти йўқотилгани айтилмоқда. Уларни алмаштириш қиймати қарийб 282 миллион долларға тенг деб баҳоланган.
Шунингдек, БАА ҳудудидаги объектга берилган зарба натижасида Terminal High Altitude Area Defense (THAAD) ракетага қарши мудофаа тизими шикастланган. Мазкур тизимнинг қиймати тахминан 500 миллион доллар деб баҳоланади.
Энг катта йўқотиш эса Қатар ҳудудидаги АҚШ базасида жойлашган радар тизимига тўғри келгани айтилмоқда. Тахминан 1,1 миллиард долларлик ушбу тизим можароннг илк кунидаёқ шикастланган.
Бундан ташқари, Баҳарайн ҳудудида жойлашган АҚШ денгиз кучларининг Бешинчи флотини қўллаб-қувватлаш марказига ҳам зарба берилгани маълум қилинди.
Ҳужум оқибатида икки сунъий йўлдош алоқа терминали ҳамда бир нечта бинолар вайрон бўлгани айтилмоқда.
