Доҳада 500 дан ортиқ Ўзбекистонлик вақтинча меҳмонхоналарда яшамоқда
Элчихона уларга зарур амалий ёрдам кўрсатмоқда.
Яқин Шарқ минтақасидаги беқарор вазият сабаб Қатар пойтахти Доха шаҳрида 500 нафardan ортиқ Ўзбекистон фуқаролари вақтинча меҳмонхоналарда яшамоқда. Бу ҳақда “Дунё” ахборот агентлиги хабар берди.
Маълум қилинишича, Ўзбекистоннинг Доҳадаги элчихонаси ходимлари ватандошлардан мунтазам хабар олиб, уларга зарур амалий ёрдам кўрсатмоқда.
Хусусан, 3 март куни дипломатик ваколатхона ходимлари “La Villa” ва “OYYO Hotel” меҳмонхоналарига ташриф буюриб, у ерда вақтинча яшаб турган фуқаролар билан учрашган ҳамда уларнинг шахсий маълумотлари асосида рўйхат тузилган.
Шунингдек, элчихона ҳамда “Ватандош” жамоат фонди вакиллари меҳмонхоналарда истиқомат қилаётган айрим эҳтиёжманд фуқаролар учун ифторлик ташкил қилган.
Тиббий ёрдамга муҳтож бўлган ватандошлар эса Ҳамад касалхонасига етказилган.
Бундан ташқари, Доҳада содир бўлган йўл-транспорт ҳодисаси оқибатида вафот этган Ўзбекистон фуқаросини дафн этиш учун зарур ҳужжатларни расмийлаштиришда ҳам элчихона томонидан кўмак кўрсатилган. Қатар ваколатли органлари билан ҳамкорликда дафн маросими ташкил этилган.
Айни пайтда Қатарнинг ҳаво ҳудуди ёпиқ ҳолда қолмоқда.
