Ироқлик адибнинг Ўзбекистон ҳақидаги китоби нашрдан чиқди

Қоҳира шаҳридаги "Ал-Вефақ" ("Dar al-Wefaq Publishing & Distribution") нашриётида ироқлик адиб Аҳмад Жасим Зубайдининг "Маънавият – Янги Ўзбекистоннинг Зуҳро юлдузи. Ислом – инсонийлик, билим ва маърифат фалсафаси" номли китоби нашрдан чиқди. Бу ҳақида ЎзА эълон қилган мақолада маълум қилинди.

 

Мақолада қайд этилишича, китобда Ўзбекистон Президенти Шавкат Мирзиёевнинг инсонпарварлик, маънавий ва илмий-маърифий соҳада олиб бораётган сиёсати ва глобал ташаббуслари акс эттирилган. Муаллиф бу асар оддий воқеалар солномаси эмас, балки халқаро ҳамкорлик, тинчлик ва маънавий қадриятларни мустаҳкамлашга қаратилган чуқур мушоҳадаси эканини таъкидлаган.

 

Нашриёт бош директори Абуд Мустафа Абуднинг сўзларига кўра, китоб Яқин Шарқда содир бўлаётган можаролар фонида халқаро ҳамжамият учун долзарб аҳамият касб этади.

 

Аҳмад Зубайдийнинг таъкидлашича, араб оламида Ўзбекистоннинг ички ва ташқи сиёсати катта ҳурмат билан кузатилмоқда, Марказий Осиёда қадриятлар жонланмоқда ва Шавкат Мирзиёевнинг ташаббуслари минтақа давлатлари ўртасидаги дўстлик ва ҳамкорликни мустаҳкамлашга хизмат қилмоқда.

 

Китоб Ўзбекистон Халқаро Ислом академияси, Тошкентдаги Ислом цивилизацияси маркази ва Самарқанддаги Имом Бухорий халқаро илмий-тадқиқот маркази каби муассасалар фаолияти билан узвий боғлиқ бўлиб, ёшларни тарбиялаш ва маънавиятни ривожлантиришга қаратилган.