НАТО Эрон билан боғлиқ можарога аралашмайди — Марк Рютте

НАТО бош котиби Марк Рютте Эрон билан боғлиқ можароларда алянс иштирок этмаслигини маълум қилди.

 

Рюттенинг айтишича, НАТОдаги айрим иттифоқчилар АҚШни Исроил билан биргаликдаги ҳарбий ҳаракатларда қўллаб-қувватлаш учун барча имкониятларни ишга солаётгани альянснинг иштирокини англатмайди. Шунингдек, котиб НАТОнинг ҳаво мудофаа тизимларининг захираларига тўхталиб, улар етарли даражада эканини қайд этди. 

 

Шу билан бирга Рютте мудофаа саноатининг янада тез ривожланиши учун  Германиядаги Rheinmetall компанияси ва бошқа кўплаб Европа ҳамда АҚШдаги мудофаа корхоналари биргаликда зарур ишларни қилаётганини таъкидлаб ўтди. 

 

“Биз Эрон ва Форс кўрфази ҳудудини муҳокама қиляпмиз — буларнинг барчаси НАТО ҳудудидан ташқарида. НАТО ҳудуди борасида эса биз доимий ҳушёрликни сақлаймиз ва унинг ишончли мудофаасини таъминлаймиз.” — дея қўшимча қилди Рютте.

 

Бош котиб шунингдек, АҚШ вазиятни паст баҳолаган деган фикрга қўшилмаслигини айтди. Унга кўра, АҚШ ва Исроилнинг ҳаракатлари жуда муҳим бўлиб, улар Эроннинг ядровий қуролга эга бўлиш салоҳиятини чеклашга хизмат қилмоқда.