Қўқондаги уйда газ портлаш сабаби аниқланди
Ҳодиса носоз ва ностандарт газ шлангидан фойдаланиш туфайли содир бўлган.
Фавқулодда вазиятлар вазирлигининг Қўқондаги уйда бир кишининг ҳалок бўлишига олиб келган газ портлаши сабабларини ўрганилганини маълум қилди.
Вазирлик ахборот хизмати раҳбари Мурод Содиқовнинг билдиришича, мутахассислар томонидан ўрганиш жараёнида, мазкур ҳолат содир бўлган хонадонда уй эгаси газ плитасини ишлатган пайтда носоз ва ностандарт шлангдан фойдаланган ва натижада портлаш юзага келган.
ФВВ вакили газ аниқловчи анализатор, яъни агар хонага газ сизиб чиқса, манбаини ўчирадиган қурилма ҳақида ҳам маълумот бериб, автоматлашган тизим ва энг хавфсиз ҳисобланишини таъкидлади.
Қўқон шаҳридаги “Бўстон” маҳалла фуқаролар йиғини ҳудудида жойлашган кўп қаватли уйда газ портлаши 25 февраль куни содир бўлиши оқибатида ёнғин келиб чиққанди. Бахтсиз ҳодиса сабаб ушбу хонадонда истиқомат қилган, 2007 йилда туғилган фуқаро бетон қоплама (плита) босиб қолиб, оғир тан жароҳати олган ва воқеа жойида вафот этган.
Ҳолат юзасидан Жиноят кодексининг 259-моддаси 2-қисми "а" банди (ёнғин хавфсизлиги қоидаларини бузиш одам ўлишига сабаб бўлиши) билан жиноят иши қўзғатилиб, жиноят иши Тергов департаменти томонидан назоратга олинди.
