Президент педофилларнинг умрбод озодликдан маҳрум қилинишини назарда тутувчи фармонни имзолади

Президент Шавкат Мирзиёев 3 март куни аёллар ва болалар ҳуқуқларини янада кучайтириш, уларга нисбатан тазйиқ ва зўравонликнинг олдини олишга қаратилган таклифлар билан танишиб чиқиқб, тегишли фармонни имзолади.

 

Фармонга кўра, вояга етмаганларга нисбатан жинсий эркинликка қарши жиноятларни содир этган ва муқаддам судланган шахслар яна шундай оғир жиноятни қилса, уларга умрбод озодликдан маҳрум қилиш ёки узоқ муддатли қамоқ жазоси тайинланиши белгиланмоқда. 

 

Хусусан, 14 ёшга тўлмаган шахснинг номусига тегиш ёки унга нисбатан зўрлик ишлатиб ғайритабиий усулда жинсий эҳтиёжни қондириш ҳолатлари энг оғир тоифага киритилмоқда.

 

Ҳужжатга мувофиқ, Жиноят кодексининг 118 ва 119-моддалари бўйича вояга етмаганларга нисбатан жиноят содир этган маҳкумлар манзил-колонияларга ўтказилмайди. Улар жазони енгиллаштириш ёки сақлаш шароитларини юмшатиш имкониятидан психологик тузатиш дастуридан ўтмасдан фойдалана олмайди.

 

Бундан ташқари, жинсий жиноятлар бўйича терговга қадар текширув ва дастлабки терговни фақат прокуратура органлари олиб боради. Маъмурий жавобгарлик тўғрисидаги кодексда ҳам шаҳвоний шилқимлик учун жазо санкцияларини кучайтириш назарда тутилган. Фармон билан вояга етмаганларни жинсий эксплуатациядан ҳимоя қилиш тизими янада қатъийлаштирилиши кўзда тутилган.

 

Шунингдек, вояга етмаганларга нисбатан содир этилган жинсий ва зўравонликка оид жиноятларни тергов қилиш прокуратура органларининг мутлақ ваколатига ўтказилади. Вояга етмаган шахслар ва хотин-қизларга нисбатан тазйиқ ва зўравонлик билан боғлиқ ишларни тергов қилиш ва кўришга ихтисослашган ва махсус тайёргарликдан ўтган терговчи ва судьялар фаолияти йўлга қўйилади.

 

Шу билан бирга, эрта никоҳ ва 16 ёшгача бўлган ҳомиладорлик аниқланган хотин-қизлар ҳақидаги маълумотларнинг сир сақланиши ва ҳимоя қилинишини таъминлаш кафолатланади.

 

Шавкат Мирзиёев 16 февраль кунги йиғилишда аёллар ва болаларга нисбатан зўравонлик учун жазони кучайтириш, педофилия учун умрбод озодликдан маҳрум этиш жазосини жорий этиш ташаббусини қўллаб-қувватлаган.