Тошкентда автобус бекатларидаги дўконлар олиб ташланади
360 дан ортиқ бекат ва 190 та катта-кичик чорраҳа хатловдан ўтказилди.
Тошкент шаҳар ҳокимлигининг маълум қилишича, Тошкент шаҳридаги автобус бекатларидаги дўконлар олиб ташланади.
“Халқаро тажрибага кўра, жамоат транспорти бекатларининг замонавий концепциялари бекат ҳудудида савдо объектларининг бўлмаслигини, йўловчиларнинг транспортни эркин ва хавфсиз кутишини, платформаларнинг етарлича кенг бўлишини ҳамда тирбандлик юқори бўлганда уларни кенгайтириш имкониятини, шунингдек, инклюзив муҳит яратилишини таъминлайди”, дейилади ҳокимлик хабарида.
Аввалроқ, Йўл ҳаракатини ташкил этиш маркази мутахассислари пойтахтнинг энг тирбанд 472 км автомобиль йўлини аниқлагани ҳақида хабар берилган эди. Ҳокимлик маълумотига кўра, биринчи босқичда 100 кмлик масофа қамраб олиниб, 360 дан ортиқ бекат ва 190 та катта-кичик чорраҳа хатловдан ўтказилган.
Ўтказилган аудит натижалари жамоат транспорти йўналишида бекатлар ўрнида 110 та савдо объекти жойлашганини кўрсатган. Улардан 61 таси бекат мажмуаси ҳудудига эгалик қилиш ва уни тасарруф этиш ҳуқуқини тасдиқловчи ҳужжатларни тақдим эта олмаган. Уларнинг фаолиятига ҳуқуқий баҳо берилиб, тегишли чоралар кўрилади.
Шаҳар маъмуриятининг тегишли қарорига асосан барча бекатлар янгиланади. Рухсат берувчи ҳужжатларга эга тадбиркорларга савдо нуқталарини ўрнатиш учун бошқа жой ажратиш орқали компенсация тўлаш механизми кўзда тутилган.
