Тошкентда ёнида ҳомиладор аёли бор ҳайдовчига ҳужум қилган ота ва ўғилга ҳукм ўқилди
Ҳодиса оқибатида ҳайдовчининг аёли ҳомиласидан айрилган.
Тошкент шаҳрининг Яккасарой туманида Jentra русумли автомобил ҳайдовчисига нисбатан содир этилган ҳужум иши бўйича суд ҳукми эълон қилинди. Бу ҳақда Тошкент шаҳар суди матбуот хизмати Zamon.uz га маълум қилди.
Яккасарой тумани жиноят ишлари бўйича суди томонидан 24 ёшли йигит ва унинг 55 ёшли отаси гуруҳ бўлиб содир этилган безориликда айбдор деб топилди.
Дастлаб уларга қасддан оғир тан жароҳати етказиш айби қўйилган эди. Бироқ суд-тиббий экспертиза хулосасига кўра, жабрланувчининг рафиқасида фақат енгил тан жароҳатлари аниқланган. Шунингдек, ҳодисадан аввал ҳомиладорликни тасдиқловчи тиббий ҳужжатлар тақдим этилмагани сабабли ҳомила тушгани ҳақидаги хабар ўз тасдиғини топмаган. Шу асосда айблов безорилик моддаси билан қайта таснифланди.
Суд ҳукмига кўра, ҳар икки судланувчига икки йил муддатга озодликни чеклаш жазоси тайинланди. Ҳибсда ўтказилган вақт инобатга олиниб, якуний жазо сифатида1 йил 6 ой 24 кун озодликни чеклаш белгиланди.
