Трамп АҚШни чексиз урушга тортмоқда — АҚШ сенатори
Сенатор Трамп бутунлай назоратдан чиқиб кетганини ва америкаликлар унинг ёлғонлари туфайли аллақачон ҳалок бўлишганини билдирди.
АҚШ сенатори Эд Марки Доналд Трампни Эронга қарши ноқоқнуний уруш олиб боришда айблади.
"Мен ҳозиргина Эрон бўйича махфий брифингдан чиқдим ва унда шундоқ ҳам билган нарсамиз тасдиқланди. Доналд Трамп ноқонуний уруш олиб бормоқда ва унинг тўхташ режаси йўқ. Бугун у биз Эронга ҳужум қилганимизни айтди, чунки у буни олдиндан сезган экан, аммо биз ҳақиқатни биламиз" — деди сенатор
Эд Маркининг билдиришича, Доналд Трамп Эроннинг ядровий ва ракета салоҳияти ҳақида ёлғон гапириб, Қўшма Штатларни Яқин Шарқдаги яна бир тугамас урушга тортмоқда.
"Трамп бутунлай назоратдан чиқиб кетди ва америкаликлар унинг ёлғонлари туфайли аллақачон ҳалок бўлишди", — дея қўшимча қилди Марки.
Аввалроқ АҚШнинг яна бир сенатори Берни Сандерс ҳам Доналд Трамп ёзда Эроннинг ядровий салоҳияти АҚШ зарбалари орқали йўқ қилинганини айтганини, аммо бу баёнот ҳақиқатга тўғри келмаслигини билдирган.
Сандерснинг фикрича, агар бу гаплар рост бўлмаса, демак ҳозирги ҳарбий операция “ёлғон баҳона” билан бошланган бўлиши эҳтимолдан холи эмас. У бу ҳолатни АҚШнинг Ироққа бостириб кириши билан таққослади.
“Трамп биз Эронга ҳужум қилишимиз кераклигини айтмоқда, чунки унинг ядро қуролига эга бўлишига йўл қўя олмаймиз. Аммо июнь ойида айнан ўзи "Эрон ядровий объектлари йўқ қилинди" деган эди. Ветнам. Ироқ. Эрон. Яна бир ёлғон. Яна бир уруш”, — деб ёзган эди Сандерс.
