Яқин Шарқдаги воқеаларда ҳалок бўлганлар орасида Ўзбекистон фуқаролари йўқ — ТИВ

Ўзбекистон Ташқи ишлар вазирлиги Яқин Шарқдаги вазият юзасидан маълумот берди.

 

Вазирлик матбуот хизматининг хабар қилишича, ҳозирги пайтга қадар Ўзбекистон фуқаролари орасида ҳалок бўлганлар ёки жароҳат олганлар қайд этилмаган. Вазирлик вазият доимий равишда назорат остида эканини таъкидлади.

 

Қайд этилишича, Шавкат Мирзиёев топшириғига биноан, Яқин Шарқ мамлакатларида бўлиб турган ватандошларнинг Ватанга қайтишини таъминлаш бўйича тизимли чора-тадбирлар амалга оширилмоқда.

 

Вазиятдаги ўзгаришлар ҳамда фуқаролар хавфсизлигини таъминлаш устуворлиги ҳисобга олиниб, мунтазам ва қўшимча авиатасҳирлар ташкил этилмоқда. Бу борадаги ишлар изчил давом эттирилаётгани билдирилди.

 

Хусусан, Саудия Арабистони ҳудудидан фуқароларни тизимли равишда эвакуация қилиш ишлари олиб борилмоқда. Шунингдек, Uzbekistan Airways авиакомпаниясининг БААдан репатриация рейси амалга оширилиши режалаштирилган.

 

Бундан ташқари, чартер рейсларини ташкил этиш масаласи авиакомпаниялар ҳамда минтақа давлатларининг авиация регуляторлари билан мувофиқлаштирилмоқда.

 

Вазирлик айрим ҳудудларда ҳаво майдонининг ёпилиши ҳамда “ҳаво ҳужуми” режими жорий этилгани сабабли имкониятлар чекланганини қайд этиб, шунга қарамай фуқаролар хавфсизлигини таъминлаш ва уларни Ватанга қайтариш бўйича ишлар туну кун давом этаётганини маълум қилди.