Яқин Шарқдан 5 мингдан ортиқ ўзбекистонлик ватанга қайтарилди
Бугунги кун ҳолатига кўра, 21 та парвоз орқали Мадина ва Жидда аэропортларидан 4 948 нафар, Дубайдан эса 235 нафар йўловчи Ўзбекистонга олиб келинган.
Яқин Шарқ минтақасида кескинлик кучайгани ортидан беш мингдан ортиқ Ўзбекистон фуқароси қайтарилди. Бу ҳақда Транспорт вазирлиги ахборот хизмати хабар берди.
Минтақада давом этаётган ҳарбий низо сабабли Баҳрайн, Қувайт, Сурия, Ироқ, Эрон, Қатар, Исроил, Иордания, БАА ва Ливан ҳаво ҳудудлари парвозлар учун турли муддатларга ёпиқ бўлиб қолмоқда.
Маълумотларга кўра, 28 февралдан бошлаб Ўзбекистон шаҳарларидан Дубай, Шаржа, Мадина, Доха, Жидда, Тел-Авив, Теҳрон ва Қувайт йўналишларидаги барча авиақатновлар бекор қилинди. Натижада 28 февралдан 2 мартга қадар Қувайт, Исроил, Саудия Арабистони, Қатар ва БААдан жами 1 681 нафар Ўзбекистон фуқароси ўз ватанига учолмаган.
Президент Шавкат Мирзиёевнинг топшириғи билан Транспорт вазирлиги резидент ва хорижий авиакомпаниялар билан аниқ режаларни ишлаб чиқди. Ишларни мувофиқлаштириш мақсадида “Ўзавиация” агентлигида 24/7 ишлайдиган махсус штаб ташкил қилинди. Қатор мамлакатларнинг ҳаво ҳудуди ёпиқ бўлиши ва вазият ўзгариб бораётганлиги, шунингдек, хорижий авиация идоралари билан олиб борилган музокаралар натижалари ҳисобга олинган ҳолда авиакомпанияларга парвозларни амалга оширишда қатъий талаблар белгиланди.
Ҳозирги вақтда резидент ва норезидент авиакомпаниялар 2026 йил 28 февралгача жўнаб кетган йўловчиларни Ўзбекистонга қайтариш учун парвозларни амалга оширмоқда. Бугунги кун ҳолатига кўра, 21 та парвоз орқали Мадина ва Жидда аэропортларидан 4 948 нафар, Дубайдан эса 235 нафар йўловчи Ўзбекистонга олиб келинган.
Транспорт вазирлиги йўловчиларга парвозлар ҳақида маълумот олишда фақат авиакомпанияларнинг расмий ваколатхоналари ва уларнинг веб-сайтларида кўрсатилган телефон рақамларига мурожаат қилишни тавсия қилмоқда.
Шунингдек, вазирлик хабарида фуқаролар текширилмаган воситачиларга мурожаат қилиш молиявий ва бошқа хавф-хатарларни келтириб чиқариши мумкинлиги ҳақида огоҳлантирилган.
Йўловчиларга ёрдам кўрсатиш мақсадида “Ўзавиация” агентлигининг cалл-маркази 24/7 ишлайди: +998 (78) 120-00-72, +998 (71) 200-07-65.
