Ўзбекистонда метан заправкалар фаолияти вақтинча чекланди
Жамоат транспорти ва хизмат кўрсатувчи объектларга газ етказиб бериш чекловларсиз давом этади.
Энергетика вазирлигининг маълум қилишича, Республика ҳудудларига совуқ ва нам ҳаво массалари кириб келиши натижасида табиий газга бўлган талаб ошган. Шу сабабли магистраль газ қувурларида босим пасайиши кузатилмоқда.
Энергетика тизими биринчи навбатда аҳоли хонодонлари ва ижтимоий соҳа объектларини узлуксиз газ билан таъминлашни устувор вазифа сифатида белгилади. Шу муносабат билан, 4-март куни соат 19:00 дан 5-март куни соат 10:00 гача Республикадаги “метан заправкалари” фаолиятига вақтинча чеклов киритилади.
Мазкур чора аҳоли ва ижтимоий соҳа объектларини барқарор газ таъминоти билан таъминлашга қаратилган. Шу билан бирга, ижтимоий соҳа объектлари ва жамоат транспорт воситалари учун газ етказиб бериш чекловларсиз давом эттирилади.
