АҚШ Эрондаги қизлар мактабига берилган зарбани текширмоқда
Қўшма Штатлар тинч аҳолини нишонга олмаслиги айтилмоқда.
Оқ уй Эрондаги қизлар мактабига қилинган ҳужум юзасидан текширув олиб бормоқда. Бу ҳақда АҚШ мудофаа вазири Пет Ҳегсетга таяниб, CNN хабар берди.
Исроил ва Қўшма Штатлар 28 феврал куни Минаб шаҳридаги қизлар мактабига авиазарба берган эди. Ҳужум оқибатида 160 дан ортиқ киши ҳалок бўлган. Қурбонлар орасида 7–12 ёшдаги қизлар ҳам бўлган. Ҳалок бўлганларни дафн этиш маросими 3 март куни Эронда оммавий тарзда ўтказилган.
“Мен ҳозир айта оладиган ягона нарса шуки, биз бу ҳодисани текширяпмиз. Биз ҳеч қачон тинч аҳолини нишонга олмаймиз, бироқ воқеа юзасидан текширув олиб борилмоқда”, — деди Ҳегсет.
Шунингдек, БМТ инсон ҳуқуқлари бўйича идораси 3 март куни Эрондаги қизлар мактабига қилинган ҳужум юзасидан мустақил тергов ўтказишга чақирди. Бироқ ташкилот ҳужум учун ким жавобгар эканини очиқламади.
Аввалроқ 2 март куни АҚШ давлат котиби Марко Рубио АҚШ ҳарбийлари мактабни атайлаб нишонга олмаганини билдирган эди. Шу билан бирга, Исроил аввал ҳам Ғазо секторидаги уруш давомида тинч аҳолига қилинган айрим зарбаларни дастлаб рад этиб, кейинчалик уларни “тасодифий ҳодиса” деб изоҳлаб келган.
АҚШ ва Исроилнинг Эронга қарши ҳарбий амалиёти ҳамда Эрон олий раҳбари Али Хоманаийнинг ўлдирилиши ортидан бошланган можаро давомида 900 дан ортиқ киши ҳалок бўлгани айтилмоқда. Эрон эса бунга жавобан минтақадаги АҚШ ҳарбий базалари ва объектларига зарбалар бермоқда.
