Қатарда круиз кемасида бўлган 71 нафар ўзбекистонлик ватанга қайтарилади
Доҳада қийин аҳволга тушиб қолган 91 нафар Ўзбекистон фуқароси элчихона вакиллари ёрдамида уй-жой билан таъминланди.
Яқин Шарқ минтақасида кескинлик кучайиши фонида Қатарда бўлиб турган ўзбекистонликларни ватанга қайтариш бўйича чоралар кўрилмоқда. Бу ҳақда “Дунё” ахборот агентлиги хабар берди.
Маълум қилинишича, Доҳада турли сабабларга кўра қолиб кетган 91 нафар Ўзбекистон фуқароси Қатар туризм ташкилоти билан келишилган ҳолда вақтинча турар жой билан таъминланган. 4 март куни Ўзбекистон элчихонаси вакиллари ватандошлар билан учрашиб, уларга зарур амалий ва ахборот кўмагини кўрсатган.
Элчи Ашраф Хўжаев Doha портига ташриф буюриб, Celestine Cruises кемасида бўлган 71 нафар ўзбекистонлик билан учрашди. Суҳбат давомида уларга юзага келган вазият ва ватанга қайтариш бўйича кўрилаётган чоралар ҳақида маълумот берилди.
Элчихона ходимлари Grand Regal Hotel, Hampton by Hilton Doha Old Town, Jouri Al Murwab Hotel ҳамда Retaj Al Rayyan Hotel меҳмонхоналарига ташриф буюриб, у ерда вақтинча истиқомат қилаётган фуқаролар ҳақида маълумот тўплади ва уларнинг рўйхатини шакллантирди. Бу эҳтимолий эвакуация жараёнларини мувофиқлаштириш учун зарур экани қайд этилди.
Айни пайтда Қатар ҳаво ҳудуди ёпиқ қолмоқда. Мамлакатда бўлиб турган хорижий сайёҳлар қўшимча расмий маълумотларни кутмоқда.
Яқин Шарқдаги кескинлик сабаб 28 февралдан бошлаб Ўзбекистон шаҳарларидан Дубай, Шаржа, Мадина, Doha, Жидда, Тел-Авив, Теҳрон ва Кувайт йўналишларидаги авиақатновлар вақтинча тўхтатилган. Натижада Кувайт, Исроил, Саудия Арабистони, Қатар ва БААда бўлган айрим Ўзбекистон фуқаролари ватанга қайта олмай қолган.
Шавкат Мирзиёев топшириғи билан Форс кўрфази мамлакатларида қолиб кетган фуқароларни ватанга қайтаришни ташкил этиш бўйича ишлар олиб борилмоқда. Транспорт вазирлиги резидент ва хорижий авиакомпаниялар билан ҳамкорликда аниқ режалар ишлаб чиқди. Жараёнларни мувофиқлаштириш мақсадида “Ўзавиация” агентлиги ҳузурида 24/7 режимида ишлайдиган штаб ташкил этилган.
4 март куни Шавкат Мирзиёев Қатар амири Тамим бин Ҳамад Aл Тани билан телефон орқали мулоқот қилиб, Қатарда бўлиб турган Ўзбекистон фуқаролари хавфсизлигини таъминлаш ва уларни ватанга қайтариш учун яратилган шароитлар учун миннатдорлик билдирди.
