Эрон атрофидаги ҳарбий зарбалар халқаро ҳуқуққа зид — БМТ

БМТнинг мустақил халқаро фактларни аниқлаш миссияси АҚШ ва Исроил томонидан Эронга қарши амалга оширилган ҳарбий ҳаракатларни, шунингдек, Теҳроннинг минтақа давлатларига қаратилган жавоб зарбаларини қоралади. Тегишли баёнот 4 март куни эълон қилинган.

 

Миссия мутахассисларининг таъкидлашича, куч ишлатиш ҳолатлари халқаро ҳуқуқ тамойилларига, хусусан, БМТ Низомига зид бўлиб, мамлакатдаги гуманитар вазиятнинг янада оғирлашишига олиб келиши мумкин.

 

Баёнотда қайд этилишича, Эрон аҳолиси бир томондан ташқи ҳарбий босим, иккинчи томондан эса ички репрессиялар орасида мураккаб шароитда қолмоқда. Мутахассислар мамлакатда инсон ҳуқуқларининг бузилиши билан боғлиқ узоқ йиллик муаммолар мавжудлигини ҳам эслатиб ўтган.

 

Миссия айниқса Минаб шаҳрида содир бўлган фожиага оид хабарлардан чуқур хавотир билдирган. Дастлабки маълумотларга кўра, қизлар мактабига уйуштирилган ҳужум оқибатида 150 дан ортиқ киши ҳалок бўлган. Қурбонларнинг аксарияти 7–12 ёшли болаларни ташкил этадигани қайд этилмоқда.

 

Шунингдек, баёнотда АҚШ ва Исроил томонидан Эрон расмийларига қарши амалга оширилган ҳаво зарбалари ҳам танқид қилинди.

 

Мутахассислар судсиз қотилликларни “адолатнинг қабул қилиб бўлмайдиган воситаси” деб баҳолаб, бундай амалиёт халқаро ҳуқуқ нормаларига зид эканини таъкидлади.

 

Бундан ташқари, Эроннинг қўшни давлатларга нисбатан амалга оширган жавоб зарбалари ҳам хавотир уйғотаяпти, деб қайд этилган. Миссия маълумотларига кўра, бундай ҳаракатлар тинч аҳолининг қурбон бўлиши ҳамда фуқаролик инфратузилмасининг вайрон бўлишига олиб келмоқда.

 

Мутахассислар шунингдек, Эрон 2025 йил 28 декабрда бошланган норозилик намойишларининг кескин бостирилиши оқибатларидан ҳали ҳам тўлиқ тикланмаганини ҳам таъкидлаб ўтган.