Эрон Туркия ҳудудига ракета учирганини рад этди, Анқара эса жавоб беришга тайёрлигини эълон қилди
Эрондан учирилган баллистик ракета Шарқий Ўрта ер денгизидаги НАТО ҳаво ва ракетага қарши мудофаа бўлинмалари томонидан тўхтатилган.
Туркия Президенти маъмурияти Алоқа бошқармаси раҳбари Бурҳанеттин Дураннинг сўзларига кўра, Туркия ҳудудига ракета қолдиқлари қулаганидан сўнг, Анқара жавоб беришга тайёрлигини билдирди.
“Ҳудудимиз ва ҳаво маконимизни ҳимоя қилиш учун зарур бўлган барча чоралар иккиланмасдан кўрилади. Мамлакатимизга нисбатан юзага келиши мумкин бўлган душманларча ҳаракатларга халқаро ҳуқуқ доирасида тегишли жавоб берилади. Шу билан бирга, бу жараёнда НАТО ва иттифоқчиларимиз билан маслаҳатлашув ва ҳамкорлик давом эттирилади”, — деб баёнот берди Бурҳанеттин Дуран.
Шунингдек, Дуран барча томонларни минтақада кескинликни ошириши ёки можарони янада кенгроқ ҳудудларга ёйилишига олиб келиши мумкин бўлган ҳаракатлардан тийилишга чақирди.
Эрон Қуролли Кучларининг Бош штаби Туркия ҳудудига ракета йўналтирилгани ҳақида тарқалган хабарларни рад этди ва расман бундай зарба берилмаганини маълум қилди. Бош штаб баёнотида айтилишича, Эрон армияси Туркиянинг суверенитетини тўла ҳурмат қилади ва мамлакатга қарата ҳеч қандай ракета учирилмаган ёки уруш ҳаракати қилинмаган.
Аввалроқ, Эрондан учирилган баллистик ракета Шарқий Ўрта ер денгизи́даги НАТО ҳаво ва ракетага қарши мудофаа бўлинмалари томонидан тўхтатилгани хабар қилинган эди.
Ракетанинг йўли Ироқ ва Сурия ҳаво ҳудудлари орқали Туркия томон йўналтирилган эди. Ҳодиса натижасида ерга тушган парчалардан айримлари Ҳатай вилояти, Дўртёл тумани ҳудудига етиб борган. Ҳодиса оқибатида ҳеч ким жабрланмаган.
