Ироқ бутунлай электр энергиясидан узилди

4- март куни Ироқнинг барча вилоятларида электр энергиясида узилиш кузатилди. Бу ҳақда мамлакат Электр энергетикаси вазирлигига таяниб, Deutsche Welle хабар берди.

 

Кейинчалик вазирлик блекаут Басра вилоятидаги Румейла электр станциясида газ ҳажмининг кутилмаганда камайиши билан боғлиқ техник носозлик  сабаб юзага келганини билдирди. Станцияда қувват кескин 1900 мегаваттга тушиб, электр ўчишига сабаб бўлган.

 

Гувоҳлар томонидан суратга олинган ва ижтимоий тармоқларда тарқатилган видеоларга қараганда, баъзи уйлар ҳали ҳам электр билан таъминланган, аммо кўчалар бутунлай чироқсиз қолган.

 

Ироқ агентлиги ИНА хабар беришича, яқинда Эрон томонидан бир неча марта ҳужумларга учраган электр станциялари ва узатиш линияларида тиклаш ишлари олиб борилмоқда.

 

Ушбу воқеа АҚШ ва Исроилнинг Эронга қарши урушининг бешинчи кунида содир бўлди. Иккала давлат 28 февраль тонгида Эрон ҳудудига зарбалар берди. 

 

Эрон эса жавобан Исроил ва Форс кўрфазидаги бир неча давлатларга зарба йўллади, жумладан Ироқдаги Эрбил аэропорти яқинига ҳам. Теҳрон эса араб давлатлари билан уруш олиб бормаётганини, фақат минтақадаги АҚШ ҳарбий базаларини нишонга олаётганини таъкидламоқда.