Марғилондаги мактабда аёлни дўппослаган эркакка нисбатан жиноят иши қўзғатилди
Дастлаб эркак аёлнинг фарзандини ураётган бўлган.
Ижтимоий тармоқларда Марғилондаги мактабда эркак бир аёлни ураётгани акс этган видео тарқалган эди. Фарғона вилояти ИИБ ахборот хизмати мазкур ҳолат юзасидан жиноят иши очилганини маълум қилди.
Маълум бўлишича, 2 март куни фуқаро М.К. Марғилон шаҳар, Истиқлол маҳалласидаги 25-умумий ўрта таълим мактабига 5-синфида ўқийдиган ўғли М.Э.ни кўргани борган вақтида, фуқаро Ж.Х. унинг фарзандини дўппослаб ураётганлигини кўриб, ажратмоқчи бўлган. Бироқ, фуқаро Ж.Х. безорилик ҳаракатларини давом эттириб, М.К. ва М.Э. ни баданининг турли жойларига уриб, қасддан тан жароҳати етказган.
Фарғона вилояти ИИБ ахборот хизматининг маълум қилишича, мазкур ҳолат юзасидан Ж.Х.га нисбатан Марғилон шаҳар ИИБ томонидан Жиноят кодексининг 277-моддаси 3-қисми “г” банди билан жиноят иши қўзғатилиб, Жиноят процессуал кодексининг 221-моддаси тартибида ушланди.
