Миллий дастур платформаси энди барча фойдаланувчилар учун очиқ
Платформа хорижий тилларни юқори малакали мутахассислардан ўрганиш имконини беради.
Миллий дастур доирасида ишлаб чиқилган таълим платформаси milliydastur.uz энди барча ўқувчилар учун очиқ бўлди. Бу ҳақда Мактабгача ва мактаб таълими вазирлиги хабар берди.
Маълум қилинишича, платформа хорижий тилларни ўрганишга мўлжалланган видео дарсларни таклиф этади. Ушбу ресурслар дастлаб “Президент иқтидорли фарзандлари” миллий дастури иштирокчилари учун мўлжалланган бўлса-да, энди барча ундан фойдаланиши мумкин.
Шунингдек, платформа битирувчи синфлар ўртасида амалга оширилаётган “Language for the future” лойиҳаси доирасида ҳам қўлланилмоқда.
Платформада IELTS ва SAT каби халқаро имтиҳонларга тайёргарлик учун видео дарслар жойлаштирилган бўлиб, улар барча фойдаланувчилар учун бепул тақдим этилмоқда.
