Наманганда Telegram орқали болалар порнографиясини тарқатган шахс қўлга олинди
У гуруҳ аъзоларидан 8–10 минг сўмгача пул талаб қилиб, ноқонуний контентни 120 нафар фойдаланувчига тарқатган.
Наманганда ҳуқуқни муҳофаза қилувчи органлар томонидан ўтказилган тезкор тадбирлар давомида Telegram мессенжери орқали вояга етмаганлар иштирокидаги порнографик материалларни тарқатган шахс қўлга олинди. Бу ҳақда вилоят ички ишлар органлари матбуот хизмати маълум қилди.
Маълум қилинишича, Наманган туманида яшовчи фуқаро мессенжер иловасида махсус гуруҳ ташкил этиб, унда вояга етмаганлар иштирокидаги порнографик материалларни намойиш этиш ва тарқатиш билан шуғулланган.
Аниқланишича, гумонланувчи гуруҳ аъзоларидан ҳар бири учун банк картасига 8 мингдан 10 минг сўмгача пул ўтказиб беришни талаб қилган. Дастлабки маълумотларга кўра, у мазкур ноқонуний материалларни жами 120 нафар фойдаланувчига тарқатган.
Мазкур ҳолат юзасидан гумонланувчига нисбатан Ўзбекистон Республикаси Жиноят кодексининг 130-моддаси 3-қисми (порнографик маҳсулотларни ишлаб чиқариш, олиб кириш, тарқатиш, реклама қилиш ёки намойиш этиш) билан жиноят иши қўзғатилди.
Ҳозирда мазкур ҳолат бўйича тергов ҳаракатлари олиб борилмоқда.
