Толибон Қандаҳорда Покистоннинг 7 та ҳарбий постини эгаллади

Толибон маъмурияти Мудофаа вазирлиги “Радд аз-Зулм” (“Зулмга қарши кураш”) номли операция давомида Қандаҳор вилояти ҳудудида Покистон ҳарбийларига тегишли еттита чегара пости назоратга олинганини эълон қилди.

 

Афғонистон томони маълумотларига кўра, операцияда 205- “Ал-Бадр” корпусининг 6-чегара бригадаси иштирок этган. Ҳарбийлар постларни эгаллаб, у ердаги қурол-яроғ ва ўқ-дориларни мусодара қилгани, Покистон ҳарбий хизматчилари орасида ҳалок бўлганлар ва жароҳатланганлар борлиги айтилмоқда. Бироқ Исломобод ушбу маълумотларни ҳозирча тасдиқлагани йўқ.

 

Вазият сўнгги кунларда кескинлашган. Аввалроқ Покистон кучлари Кобул, Қандаҳор ва чегара ҳудудларидаги айрим нишонларга ҳаво зарбалари берган эди. Покистон томони бу ҳужумларни Теҳрик-е Толибон Покистон (TTP) жангарилари жойлашган лагерларга қарши “Ғазаб лил-Ҳақ” (“Ҳақиқат учун ғазаб”) операцияси доирасида амалга оширилганини маълум қилган.

 

Жанговар ҳаракатлар давом этаётган бир пайтда, халқаро ташкилотлар ва БМТнинг Афғонистондаги миссияси — UNAMA тинч аҳоли орасида қурбонлар сони ортиб бораётганидан хавотир билдирмоқда. БМТ маълумотларига кўра, 2026 йил 4 март ҳолатига эскалация бошланганидан бери камида 42 нафар тинч аҳоли вакили ҳалок бўлган, 100 дан ортиқ киши жароҳатланган.

 

Айни пайтда Дуранд чизиғи бўйлаб бир нечта ҳудудларда тўқнашувлар давом этмоқда. Хусусан, Хост вилояти, Пактика вилояти ва Кунар вилояти ҳудудларида вазият кескинлигича қолмоқда.