ТОП-300 олийгоҳларга кирган ёшлар ва педагогларга 20 минг долларгача таълим кредити берилади
Кредитнинг асосий қарзи талабанинг расмий ўқиш муддати тугаганидан сўнг еттинчи ойдан бошлаб етти йил давомида қайтарилади
Ҳукуматнинг 2 мартдаги 88-сонли қарори билан “Хорижий олий таълим ташкилотларида ўқиш истагидаги ёшлар ва педагог ходимларга таълим кредитини ажратиш тартиби тўғрисида”ги низом тасдиқланди.
Низом Таълим кредитини молиялаштириш жамғармаси ҳисобидан имтиёзли таълим кредитини ажратиш ва уларни қайтариш тартибини белгилайди.\
Низомга кўра, QS (Quacquarelli Symonds) ёки THE (The Times Higher Education) бўйича ТОП-300 таликка киритилган хорижий олий таълим ташкилотларига ўқишга қабул қилинган 30 ёшдан ошмаган, жумладан 30 ёшдан бўлган ёшлар ва педагогларга ажратилади. Кредит олувчилар Ўзбекистон фуқароси бўлиши талаб қилинади.
Кредит 1 ўқув йили учун 20 минг АҚШ долларигача миқдордаги эквивалентда миллий валютада талабаларнинг бакалавриат ҳамда магистратура дастурларида ўқиши учун берилади. Кредитнинг асосий қарзи талабанинг расмий ўқиш муддати тугаганидан сўнг еттинчи ойдан бошлаб етти йил давомида қайтарилади.
Кредит олувчи банкка мурожаат қилишда ариза, шахсни тасдиқловчи ҳужжатлар нусхаси, таклифнома-хат (1-курслар учун), 2-курсдан бошлаб академик ўзлаштириш натижалари, тўлов-контракт асосида ўқиш бўйича шартнома ҳамда олий таълим ташкилотининг банк реквизитлари кўрсатилган инвойс тақдим этиши керак бўлади.
Шу билан бирга, биргаликда қарз олувчиларнинг сўнгги 12 ойлик даромадлари юзасидан маълумот, 30 ёшдан ошган педагоглар учун меҳнат дафтарчасидан кўчирма ҳам талаб қилинади.
Таълим кредити ставкаси Марказий банкнинг асосий ставкаси миқдорида белгиланади.
