Ўзбекистон қалбаки дорилар айланмасига қарши кураш кескин кучайтирилади
Ўтган йил давомида 57 мингдан ортиқ контрафакт дорилар аниқланган, 21 турдаги хорижий дорилар Ўзбекистонга кириши тўхтатилган.
Президент Шавкат Мирзиёев 5 март куни фармацевтика соҳасини ривожлантириш ва сифатсиз дорилар айланмасига қарши курашни кучайтиришга бағишланган видеоселектор йиғилишида масъулларга аниқ топшириқлар берди.
Давлат раҳбари дориларнинг ноқонуний айланмаси бўйича гиёҳванд ва психотроп моддаларга қарши олиб борилаётган қатъий чоралар каби кескин кураш олиб борилишини таъкидлади. Қайд этилишича, ўтган йил давомида 57 мингдан ортиқ рўйхатдан ўтмаган контрафакт дорилар аниқланган ва натижада 21 турдаги нуфузли хорижий компания ўз дориларини Ўзбекистонга етказишни тўхтатган.
Президент шунингдек, сифатсиз ва қалбаки дорилар савдоси учун жавобгарликни ошириш бўйича янги қонун лойиҳасини ишлаб чиқиш муҳимлигини таъкидлади.
Йиғилишда фармацевтика соҳасидаги илмий салоҳият ҳам кўриб чиқилди. Ҳозирда 6 та илмий-тадқиқот институтида 300 дан зиёд олимлар фаолият юритмоқда, йилига эса 1 мингга яқин ёшлар фармацевтика олийгоҳларини тамомламоқда. Шу билан бирга, саноат ва илм-фан орасидаги узилиш муаммоси қайд этилди.
Шу муносабат билан Кимё-фарматсевтика, Вакцина ва зардоблар ҳамда Шарқ табобати институтлари негизи бўйича Миллий биофарматсевтика илмий-тадқиқот институти ташкил этилади. Институт Тошкент фарма парк ҳудудида жойлашиб, олимларга клиник олди, био ва кимё лабораториялари ҳамда 250 ўринли халқаро клиник тадқиқотлар маркази орқали илмий ишларга имконият яратади.
Президент Мирзиёев фармацевтика соҳасини модернизация қилиш ва хорижий сармояларни жалб қилиш борасидаги ишларни давом эттириш зарурлигини таъкидлади.
