Ўзбекистонда илк бор қон плазмасидан инсон альбумини ишлаб чиқариш бошланади
Вилоят ҳокимликлари томонидан жами 2,5 миллиард долларлик фармацевтика лойиҳалари бўйича таклифлар тайёрлангани маълум қилинди.
Президент Шавкат Мирзиёев раислигида фармацевтика тармоғига бағишланган видеоселектор йиғилишида жорий йилда 1 миллиард долларлик янги лойиҳаларни шакллантириб, ишга тушириш зарурлиги қайд этилди.
Маълум қилинишича, вилоят ҳокимликлари томонидан жами 2,5 миллиард долларлик фармацевтика лойиҳалари бўйича таклифлар тайёрланган. Ушбу лойиҳалар ҳисобига йилига 1 миллиард долларлик импорт ўрнини босувчи дориларни ишлаб чиқариш имконияти мавжуд.
Хусусан, Андижон вилоятида 203 миллион долларлик 16 та лойиҳа амалга оширилиши режа қилинмоқда. Жумладан, 30 миллион долларлик лойиҳа доирасида Ўзбекистонда илк бор қон плазмасидан инсон альбумини ишлаб чиқариш бошланиши кўзда тутилган.
Шунингдек, йиғилишда Навоий, Қашқадарё ва Сурхондарё вилоятлари томонидан таклиф этилган лойиҳаларнинг умумий қиймати 100 миллион долларга ҳам етмагани айтилди.
