Эрон хавфсизлик сабабли янги олий раҳбар номини эълон қилишни кечиктирди
АҚШ ва Исроил баёнотлари янги раҳбар ҳам эҳтимолий нишонга айланиши мумкинлиги ҳақидаги хавотирларни кучайтирмоқда.
Эрон расмийлари мамлакатнинг собиқ олий раҳбари Али Хоманаий вафотидан сўнг янги етакчини тайинлаш масаласини хавфсизлик сабабларига кўра вақтинча кечиктирди. Бу ҳақда The New York Times Эрон ҳукуматига яқин икки манбага таяниб маълум қилди.
Манбаларга кўра, янги олий раҳбар номзодининг эълон қилиниши АҚШ ва Исроил томонидан билдирилган баёнотлардан кейин орқага сурилган. Айрим изоҳларда янги тайинланадиган раҳбар ҳам эҳтимолий нишонга айланиши мумкинлиги таъкидланган.
Ҳозирча собиқ олий раҳбарнинг ўғли — Можтаба Хоманаий асосий номзодлардан бири сифатида кўрилмоқда. Бироқ унинг номи оммавий ахборот воситаларида тилга олиниши билан хавфсизликка оид хавотирлар ҳам кучайгани қайд этилмоқда.
АҚШ президенти Дональд Трамп эса бу борада кескин баёнот бериб, Можтаба Хоманаий номзодини “қабул қилиб бўлмайдиган танлов” деб баҳолаган.
Шунингдек, Исроил мудофаа вазири Исраэль Кац ижтимоий тармоқлардаги чиқишида Эрон томонидан тайинланадиган ҳар қандай янги раҳбар эҳтимолий нишонга айланиши мумкинлигини таъкидлаган.
