Эрон Россиядан ёрдам сўрамади — Кремл
Дмитрий Песков Яқин Шарқдаги уруш Москванинг уруши эмаслигини ва уни фақат бошлаган одам тўхтатиши мумкинлигини айтди.
Россия президенти матбуот котиби Дмитрий Песков журналистларга Яқин Шарқдаги кескинлик ортиб бораётган бир пайтда Россия Эрон томонидан ҳеч қандай қурол-яроғ ёки бошқа амалий ёрдам юзасидан сўров олмаганини маълум қилди.
Песковнинг таъкидлашича, Москва сиёсий дастакдан ташқари, Яқин Шарқдаги урушга аралашмайди ва бу Россиянинг уруши эмас.
“Россия ўз манфаатларига мос келадиган ишларни амалга оширишга интилади ва бу урушни тўхтата олмайди; буни бошлаган томон тўхтатиши мумкин”, — дея қўшимча қилди Песков.
Шунингдек, котиб Яқин Шарқдаги низо Россиядаги ёнилғи нархларига таъсир қилмаслигини, бозорни монополияга қарши кураш органлари назорат қилаётганини қайд этди. Европага газ етказиб беришни тўхтатиш бўйича якуний қарор ҳали қабул қилинмаганини, у фақат ҳукуматга топшириқ сифатида берилганлигини билдирди.
Россия ва Эрон 2025 йилда стратегик ҳамкорлик шартномасини имзолаган, бироқ у ўзаро мудофаа мажбуриятларини кўзда тутмайди.
Шу ҳафта Россиянинг БМТдаги вакили Эронга қилинган ҳужумларни “атайлаб уюштирилган, олдиндан режалаштирилган ва асоссиз қуролли тажовуз” сифатида қоралагани маълум қилинган эди.
