Эронга мен айтган раҳбар тайинланади — Трамп
Қўшма Штатлар президенти Эрон oлий раҳнамоси сифатида Хоманаийнинг ўғли тайинланишига қарши чиқди.
АҚШ президенти Доналд Трамп Axios нашрига берган интервьюсида Эронда ҳокимият тепасига марҳум олий раҳнамо Али Хоманаийнинг ўғли келишига қаршилигини билдирди ва янги раҳбарни танлаш жараёнида шахсан иштирок этишини маълум қилди.
Трампнинг сўзларига кўра, Оятуллоҳ Хоманаийнинг ўғли Мужтабо Хоманаий Вашингтон учун маъқул бўлмаган номзод ҳисобланади. Президент Эрондаги аввалги сиёсатни давом эттирадиган ҳар қандай вориснинг тайинланишига АҚШ қарши эканини таъкидлади ва агар унга маъқул номзод тайинланмаса, Қўшма Штатлар беш йил ичида яна уруш бошлашга тўғри келишини билдирди.
Мужтабо Хоманаий 28 февраль куни отаси вафотидан сўнг асосий раҳнамолик учун номзод бўлиб қолган. Янги раҳбарни Эрон Экспертлар ассамблеяси сайлаши керак бўлиб, 4 март куни ассамблея аъзоси Маҳмуд Ражаби жараён аллақачон бошланганини маълум қилган.
Ҳозирда мамлакатни уч кишидан иборат муваққат кенгаш бошқармоқда: Масъуд Пезешкиён, суд ҳокимияти раҳбари Ғулом Ҳусайн Муҳсиний-Эжеий ва Оятуллоҳ Ориф.
Экспертлар ва нашрлар, жумладан The New York Times, Мужтабо Хоманаийнинг тайинланиши мамлакат ичида норозилик ва шиа руҳонийлари томонидан қаршиликка сабаб бўлиши мумкинлигини таъкидламоқда.
Исроил эса Эронда аввалги сиёсатни давом эттирувчи янги раҳбар “йўқ қилиш учун нишон” бўлиши мумкинлигини билдирган.
