Еврокомиссия янги миграция инқирозидан хавотирда — Die Welt
Туркия 90 минг қочқин учун чодир шаҳарчаси қуришга тайёргарлик кўрмоқда.
Еврокомиссия АҚШ-Исроил ва Эрон билан боғлиқ можаролар туфайли кенг кўламли миграция ҳаракати бўлиши мумкин деб ҳисобламоқда. Бу ҳақда манбаларга таяниб Die Welt ёзмоқда.
Қайд этилишича, Яқин Шарқдаги можаро чўзилиб кетса, Эрон ва қўшни давлатларда гуманитар инқироз юзага келиши ва 2015 йилдаги каби миграция ҳаракатлари бошланиши мумкинлиги билдирилган.
Маълумотларга кўра, ҳозирнинг ўзида мамлакат ичида, қишлоқ жойларга ва денгиз соҳилларига одамларнинг кўчиши кузатилмоқда.
Брюсселдаги муҳокамаларда, айниқса, Эронда истиқомат қилувчи 2,5 миллионга яқин афғонлар билан боғлиқ вазият хавотир уйғотаётгани таъкидланган. Агар вазият янада беқарорлашса, улар мамлакатни тарк этиб, қўшни давлатларга, биринчи навбатда, Туркияга йўл олишлари мумкин.
Шунингдек, Туркия ички ишлар вазири Мустафо Чифтчи чоршанба куни учта Туркия-Эрон чегара пунктида ноодатий ҳаракатлар кузатилмаганини айтди. Шунга қарамай, ҳукумат буфер зонаси ва 90 минг нафаргача қочқин учун чодир шаҳарчасини қуришга тайёргарлик кўрмоқда.
Европа Иттифоқининг Бошпана масалалари бўйича агентлиги ҳисоботига кўра, 90 миллион аҳолига эга Эронда ҳатто қисман беқарорлик ҳам катта миграция оқимини келтириб чиқариши мумкин. Агар аҳолининг камида 10 дан 1 қисми мамлакатни тарк этишга мажбур бўлса, оқибат кўлами сўнгги ўн йилликлардаги энг йирик миграция инқирозлари билан таққосланиши мумкин.
