Кўп хонадонли уйлар қурилишида комплекс ёндашув жорий этилади

Ўзбекистонда кўп хонадонли мажмуаларни барпо этишда комплекс қурилиш механизмларини жорий этиш ва жараёнларда шаффофликни таъминлаш бўйича янги тартиблар белгиланди. Бу ҳақда Президентнинг “Кўп квартирали турар жой мажмуаларини қуришда комплекс қурилиш механизмларини жорий этиш ва шаффофликни таъминлаш чора-тадбирлари тўғрисида”ги қарорида назарда тутилган.

 

Ҳужжатга кўра, 2026 йил 1 мартдан 2028 йил 1 мартгача айрим ер участкаларида кўп квартирали уйларни комплекс қурилиш механизмлари асосида барпо этишни назарда тутувчи “Тартибга солиш қумдони” махсус ҳуқуқий режими тажриба тариқасида жорий этилади.

 

Президентнинг аввал қабул қилинган ПФ–29-сон фармонига мувофиқ ташкил этилган инвестиция компаниялари ҳудудларда комплекс қурилиш лойиҳаларини амалга ошириш учун масъул ташкилот сифатида фаолият юритади.

 

Қарорда ҳудудларда яшил боғлар, экопарклар ва хиёбонлар барпо этиш инвестиция компаниялари фаолиятининг асосий йўналишларидан бири этиб белгиланган. Бунда мазкур мақсадлар учун давлат мулки объектлари ва ер участкаларини сотишдан маҳаллий бюджетга тушадиган маблағларнинг 10 фоизи, шунингдек маҳаллий бюджетларнинг қўшимча манбаларининг камида 5 фоизи йўналтирилиши кўзда тутилган.

 

Шунингдек, Тошкент шаҳрида яшил ҳудудларни кенгайтириш ҳамда ҳар бир туманда биттадан экобоғ барпо этиш бўйича таклифлар ишлаб чиқилиши режалаштирилган.

 

Қарорга мувофиқ, 2027 йил 1 январдан бошлаб кўп квартирали уйларнинг қурилиш-монтаж ишларини бошлаш учун бериладиган рухсатнома “Шаффоф қурилиш” тизими орқали “Уй-жой” ягона рақамли урбанизация платформасида идоралараро интеграция асосида автоматик тарзда шакллантирилади.