Олий таълим вазирлиги ходими 100 минг доллар билан қўлга тушди
Ходим нодавлат олий таълим муассасасининг филиали очилишига лицензия бериш учун пора талаб қилган.
Ўзбекистон Олий таълим, фан ва инновациялар вазирлигининг Таълим ташкилотларини лицензиялаш бўлими етакчи мутахассиси Қарши шаҳрида фаолият юритувчи нодавлат олий таълим муассасасининг Сурхондарёдаги филиалини очиш учун лицензия бериш жараёнида 100 минг АҚШ доллари талаб қилганлиги учун ушланди. Бу ҳақда Zamon.uzгa ДХХ маълум қилди.
Ҳодиса Давлат хавфсизлик хизмати ДХХ ходимлари томонидан Тошкентда ўтказилган тезкор тадбирда аниқланди. Ходим сўралган пул маблағини олган вақтида ашёвий далиллар билан қўлга олинган.
Давлат хавфсизлик хизмати Тергов бошқармаси томонидан мазкур шахсга нисбатан Ўзбекистон Жиноят Кодексининг 168-моддаси 4-қисми “а” банди бўйича жиноят иши қўзғатилди ва “қамоқ” эҳтиёт чораси қўлланди. Ҳозирда тергов ҳаракатлари олиб борилмоқда.
