Озарбайжон Эрондаги дипломатларини чақириб олишга қарор қилди
Қарор Нахчивондаги дрон ҳужумидан сўнг қабул қилинган, аммо Эрон томони воқеа ортида учинчи кучлар бўлиши мумкинлигини билдирган.
Озарбайжон ҳукумати Эрондаги дипломатик ходимларини чақириб олишга қарор қилди. Бу ҳақда мамлакат ташқи ишлар вазири Жейҳун Байрамов маълум қилди.
Унинг таъкидлашича, мазкур қарор Илҳом Алиев томонидан қабул қилинган. Байрамовнинг сўзларига кўра, Боку Эрондаги дипломатик миссияда фаолият юритаётган барча ходимларни мамлакатга қайтаришни режалаштирмоқда.
Мазкур қарор 5 март куни Нахчивон Автоном Республикаси ҳудудига учувчисиз учиш аппарати ҳужуми юз бергани ҳақидаги хабарлар фонида қабул қилинган. Озарбайжон томонининг маълумотига кўра, икки дрон аэропорт биноси ҳамда мактаб яқинидаги ҳудудга зарба берган, натижада тўрт нафар фуқаро жароҳат олган.
Боку мазкур ҳужумда Эронни айблаб, ҳудудга жами тўртта дрон юборилганини билдирган.
Теҳрон эса ушбу айбловларни қатъиян рад этмоқда. Эрон ташқи ишлар вазири Аббос Ароқчи Байрамов билан ўтказган суҳбатида Эрон ҳужумга алоқадор эмаслигини таъкидлаб, воқеа ортида икки давлат ўртасидаги муносабатларни кескинлаштиришга уринaётган кучлар туриши мумкинлигини билдирган.
