Сув танқислигининг олдини олишга 600 миллиард сўм йўналтирилади
Мазкур маблағлар ҳисобидан сув йўқотилиши юқори бўлган 389 километр узунликдаги каналлар реконструкция қилиниб, бетонлаштирилади.
Ўзбекистонда сув ресурсларидан самарали фойдаланиш ва сув танқислигининг олдини олиш мақсадида канал ва суғориш тармоқларини реконструкция қилиш ишлари амалга оширилади. Бу борада Президент қарори қабул қилинди.
Ҳужжатга мувофиқ, сув инфратузилмасини янгилаш ишлари учун давлат бюджети ҳисобидан маблағ ажратилади. Жумладан, каналлар ва суғориш тармоқларини бетонлаштириш ишларига 480 млрд сўм, сув танқислигининг олдини олишга қаратилган чора-тадбирлар учун 120 млрд сўм йўналтирилади.
Мазкур маблағлар ҳисобидан сув йўқотилиши юқори бўлган 389 километр узунликдаги каналлар реконструкция қилиниб, бетонлаштирилади. Лойиҳани амалга ошириш натижасида йилига ўртача 206 млн куб метр сув ҳамда 26 млн киловатт-соат электр энергиясини тежаш имконияти яратилиши кутилмоқда.
Шунингдек, амалга ошириладиган ишлар орқали 159 минг гектар суғориладиган ерларнинг сув таъминотини яхшилаш режалаштирилган. Мутасаддиларга кўра, бу чоралар қишлоқ хўжалигида сувдан самарали фойдаланишни таъминлашга хизмат қилади.
