Теҳрон марказидаги Хоманаийнинг махфий бункери вайрон қилинди — IDF
Операцияда 50 га яқин ҳарбий самолёт иштирок этган.
Исроил ҳарбий-ҳаво кучлари Эрон пойтахти Теҳрон марказида жойлашган ер ости ҳарбий қўмондонлик иншоотига зарба берди. Бу ҳақда Israel Defense Forces (IDF) матбуот хизмати маълум қилди.
IDF баёнотига кўра, операцияда қарийб 50 та ҳарбий самолёт иштирок этиб, нишонга юздан ортиқ оқ-дорилар ташланган. Ҳужум натижасида ҳукумат бинолари мажмуаси остида жойлашган ер ости қўмондонлик бункери вайрон қилинган.
Исроил ҳарбий разведкаси маълумотларига кўра, ушбу бункер Теҳрон марказидаги бир нечта кўчалар остида жойлашган бўлиб, ер юзасига бир нечта чиқиш йўлларига эга. Иншоот Эрон раҳбарияти учун муҳим ҳарбий қўмондонлик марказларидан бири сифатида фойдаланилган.
IDF таъкидлашича, бункер махсус равишда Эрон олий раҳбари Али Хоманаий учун қурилган. Бироқ Исроил томони маълумотига кўра, Оятуллоҳ мазкур бошпанадан фойдаланишга улгурмасдан олдин ҳалок бўлган.
Исроил армияси ушбу зарба Эроннинг ҳарбий бошқарув ва назорат тизимига жиддий зарар етказганини қайд қилди.
